4 сәуірден 5 сәуірге қараған түні Бразилияның Фос-ду-Игуасу қаласында World Boxing ұйымы ұйымдастырған бокстан әлем кубогының жартылай финалдық кездесулері өтті. Қазақстан атынан рингке шыққан бес спортшының үшеуі ғана финал жолдамасын иемденді.
Әйелдер арасындағы 51 келіге дейінгі салмақ дәрежесінде Жазира Орақбаева Польшадан келген қарсыласы Наталия Кучевскаяны 3:2 есебімен жеңіп, финалға жолдама алды. Бұл кездесу – тартысқа толы, тактикалық шеберліктің көрінісі болды.
Қазақстанның тағы бір үміті – 57 келіде сынға түскен Ұлжан Сәрсенбек. Алайда ол өз қарсыласы, поляк боксшысы Юлия Шереметадан 0:5 есебімен жеңіліп қалды. Юлия кездесу бойы шабуылды тоқтатпай, толық басымдық танытты.
55 келіге дейінгі салмақта Нұрсұлтан Алтынбек үндістандық Маниш Ратхорені 5:0 есебімен жеңді. Бұл жекпе-жекте Нұрсұлтанның шапшаңдығы мен дәл соққылары шешуші рөл атқарды.
80 келі салмақтағы Диас Молжігітов үшін бұл турнир сәтсіз аяқталды. Өзбекстан өкілі Джавахир Умматалиевпен өткен "көршілер дербиінде" Диас 0:5 есебімен жеңілді. Умматалиев бастан-аяқ басымдық көрсетіп, финалға өтті.
Ең әсерлі сәттердің бірі — 85 келіде сынға түскен Дәулет Төлемісовтің өнері. Ол Франциядан келген Абдулайе Траорені екінші раундта нокаутпен жеңіп, финалға сенімді қадам басты.
