Кәсіпқой бокста екінші жартылай жеңіл салмақта өнер көрсетіп жүрген қазақстандық боксшы Сұлтан Зауырбек Астанада өтетін үлкен бокс кеші алдындағы көңіл-күйімен бөлісті.
Сұлтан Зауырбек бүгін Оңтүстік Африканың талантты өкілі Азинга Фузилемен жұдырықтасады. Бұл кездесу "Барыс Аренада" өтетін бокс кешінің қосалқы басты жекпе-жегі болады. Кештің негізгі оқиғасы — орта салмақта WBO және IBF тұжырымдары бойынша әлем чемпионы Жәнібек Әлімханұлы (16-0, 11 KO) мен Францияның жеңілмеген боксшысы Анауэль Нгамисенге (14-0, 9 KO) арасындағы белбеу қорғау айқасы.
"Бұл — менің Қазақстандағы соңғы төрт жылдағы алғашқы жекпе-жегім. Өз елімде жұдырықтасу — мен үшін үлкен қуаныш. Физикалық әрі психологиялық тұрғыдан толық дайынмын. Көрермендерге әсерлі шоу ұсынамыз. WBA рейтингінің жаңартылған нұсқасында мен екінші орынға көтерілдім. Бұл — чемпиондық белбеуге бір қадам жақындағанымның белгісі. IBF тұжырымы бойынша белбеу қазіргі таңда бос, сондықтан осы айқастан кейін міндетті үміткер атануға үміттімін", — деді Зауырбек.
Британдық журналистер Сұлтан Зауырбекті "Қазақ нокауттар королі" деп атаған болатын. Бұл лақапқа қатысты боксшы өз ойын білдірді:
"Мен әрқашан рингке патшадай сеніммен шығамын. Иә, нокаут — бұл маңызды. Бірақ мен тек соған ғана жұмыс істемеймін. Көрермендер рингке әдемі бокс көруге келеді. Сол себепті мен әрқашан тартысты жекпе-жек, шынайы шоу көрсетуге тырысамын. Нокаут — әр боксшы үшін маңызды, бірақ ең бастысы — көркем өнер көрсету", — деп қорытындылады Зауырбек.
