Қазақстандық бұрымды боксшы Астанадағы бокс кешіндегі айқын жеңісінен кейін алдағы жоспарларымен бөлісті.
Қазақстанның кәсіпқой бокстағы жарық жұлдыздарының бірі, сұлулығы мен шеберлігімен танылған Балауса Мұздыман Астанада өткен Battle of the Brave бокс кешінде филиппиндік Мария Тереза Пинилиді (7-1, 2 КО) айқын басымдықпен жеңді. Сегіз раундқа созылған жекпе-жекте төрешілер бірауыздан жеңісті қазақстандық спортшыға берді. Бұл — Балаусаның кәсіби рингтегі жетінші жеңісі, оның бесеуі нокаутпен аяқталған.
Жеңістен кейінгі 1bol.kz берген сұхбатында Балауса өзінің тактикалық дайындығы мен қарсыласқа арнайы жоспарланған стратегиясының іске сәтті асқанын айтты. Сонымен қатар, ол бұл жеңістің спорттық мансабындағы жаңа белеске жол ашатынын да жеткізді.
“Бұл менің карьерамдағы ең алғашқы сегіз раундтық жекпе-жегім. Біз үлкен ірі жекпе-жектерге дайындық үстіндеміз. Сол себепті сегіз раунд мен үшін өте жақсы болды деп ойлаймын. Бастапқыда қарсыласым америкалық қыз болған он төртте нөл рекордымен. Бірақ белгісіз бір себептермен ол екі апта қалғанда ауысып кетті. Бірақ біз жақсы дайындықпен келдік деп ойлаймын. Және де филиппиндік қыз өздеріңіз көргендей өте мықты дайындықпен келген”, – деді Мұздыман.
Сұхбат барысында 1bol.kz журналистері Балаусадан Ангелина Лукаспен жекпе-жекке шығу мүмкіндігі туралы да сұрады.
«Америка Құрама Штаттарына кету ойда бар. Ал Ангелина Лукас тарапынан ешқандай жауап болмады. Сол себепті қазір ол қызық емес.», — деді бұрымды боксшы.
