Астанада өткен жекпе-жектен соң Олимпиада чемпионының қолы қатты зақымданды.
Астанада өткен бокс кешінде украиналық Игорь Шевадзуцкийді жеңгеннен кейін Өзбекстанның қос дүркін Олимпиада чемпионы Баходир Джалолов ауыр жарақат алды.
Жекпе-жектен кейін желіде тараған видеода Джалоловтың жарақат алған қолының білегін қысып ұстап, кейін оны мұз салынған ыдысқа салып отырғанын көруге болады. Боксшының бет-әлпетіндегі ауырсыну сезімі анық байқалады. Бұл сәт жанкүйерлерді алаңдатты.
Желі қолданушыларының кейбірі Джалоловтың қолы сынған болуы мүмкін деген пікір білдірді. Ресми диагноз әлі жарияланбағанымен жарақаттың ауыр екені аңғарылып тұр.
Айта кетейік, бұл жекпе-жекте Баходир Джалолов жеңіске жеткенімен, жарақат спорттық мансабына әсер етуі мүмкін. Бокс кешінде ол қарсыласы Шевадзуцкиймен тартысты айқас өткізіп, төрешілердің шешімімен жеңіске жетті.
