Орта салмақтағы WBC тұжырымы бойынша әлем чемпионы америкалық Карлос Адамес келесі жекпе-жегін қазақстандық Жәнібек Әлімханұлына қарсы өткізгісі келетінін мәлімдеді.
Карлос Адамес Жәнібекке қарсы шығуға дайын
"Командам егер Ширазды жеңсем, Жәнібекпен жекпе-жек аламын деген. Енді сол кездесуді күтіп жүрмін. Бұл – мен армандаған айқас. Осы жолы сол мүмкіндікке қол жеткіземін деп сенемін. Әлімханұлы – мықты боксшы. Бірақ мені жеңе алатындай дәрежеде емес деп ойлаймын", – деді Адамеске сілтеме жасаған Boxing Scene порталы.
Еске сала кетейік, Жәнібек Әлімханұлы 5 сәуір күні Астанада өткен жекпе-жекте франциялық Анауэль Нгамисенгимен кездесіп, бесінші раундта техникалық нокаутпен жеңіске жетті. Осылайша ол WBO және IBF тұжырымдары бойынша чемпиондық белбеулерін қорғап қалды.
Орта салмақтағы белді титулдардың иесі саналатын екі мықты боксшының арасындағы ықтимал жекпе-жек — жанкүйерлер арасында қызу талқыланып жатыр. Егер келіссөздер сәтті өтсе, жақын арада біз Адамес пен Әлімханұлы арасындағы тарихи кездесудің куәсі болуымыз мүмкін.
