Танымал қазақстандық продюсер, әнші Қайрат Нұртастың анасы Гүлзира Айдарбекова ұлына Ресей тарапынан нақты ұсыныстар түскенін растады.
Гүлзира Айдарбекованың айтуынша, Қайрат Нұртасты бірнеше рет Ресейдің танымал телевизиялық жобаларына шақырған. Солардың бірі – "Добрый вечер" бағдарламасының бас продюсері:
“Ол маған қоңырау шалып, Қайратты сұрады. “Бізге беріңіздер, ол Дима Билан сияқты жұлдыз болады”, – деді. Дауысы ерекше, жүрекке жететін үн естідім деп, бізді интернеттен іздеп тауыпты”, – дейді Айдарбекова.
Алайда продюсер бұл ұсыныстан бірден бас тартқанын айтады. Оның басты себебі – Қайрат сол кезеңде отбасылы азамат болған және анасы оның Қазақстанда қалып, ел үшін еңбек еткенін қалаған.
“Ол кезде ұлым отбасылы еді. Шетелде сұлтан болғанша, өз елінде ұлтан болғаны дұрыс деп шештім”, – деп түйіндеді ол.
Айта кетейік, бұған дейін Қайрат Нұртастың шетелде жүрген сәттері мен шығармашылық жоспарлары әлеуметтік желіде қызу талқыланып, кей сынға ұшыраған болатын.
