Әлемге әйгілі қазақстандық әнші, Қазақстанның халық әртісі Димаш Құдайберген Қырғызстанның Ыстықкөл облысындағы Чолпон-Ата қаласына келді.
Музыка жанкүйерлері асыға күткен IV халықаралық “Мейкин Азия” музыкалық фестивалі Чолпон-Атада өтуде. Осы шараға арнайы шақыртумен Димаш Құдайберген де келді.
ТҮРКСОЙ ұйымының бас хатшысы Сұлтан Раевтың айтуынша, дәл осы фестивальде 2013 жылы Димаш өзінің алғашқы халықаралық жеңісіне жетіп, Гран-при иегері атанған.
“Ол алғаш рет осы сахнада жұлдыз болып жанды. Арада 12 жыл өтті. Енді, міне, Димаш сол тарихи алаңға қайта оралды”, – делінген хабарламада.
Бүгінде Димаш Құдайберген — халықаралық деңгейдегі өнер иесі. Оның шығармашылығын миллиондаған тыңдарман бағалап, әрбір елде ерекше құрметпен қарсы алады.
