UFC ұйымының жеңіл салмақтағы мықты файтері, грузиялық Мераб Двалишвили Лас-Вегаста өткен жаттығудан кейін қазақ файтерлеріне қолдау көрсетті. Ол Әліби Ыдырыс пен Дастан Амангелдіні көлігімен жаттығу залынан үйге дейін жеткізді.
Мераб Двалишвили қазақстандық файтерлермен бірге жаттығу жасап жүр. Әсіресе UFC келісімшарты үшін күресіп жатқан Әліби Ыдырыс үшін мұндай тәжірибе өте құнды.
“Let's go, Kazakhstan!” — деді Двалишвили көлікте отырған сәтінде. Бұл видео әлеуметтік желілерде кеңінен таралып үлгерді.
10 жекпе-жекте жеңіліп көрмеген Әліби Ыдырыс (10–0) қазір The Ultimate Fighter 33 шоуының финалына дайындалып жатыр. Бұл жобада жеңіске жеткен спортшы UFC-пен ресми келісімшартқа қол қояды.
Финалдағы қарсыласы 6 тамыз күні өтетін екінші жартылай финалдан кейін белгілі болады. Бұл кезеңде америкалық Джозеф Моралес (12–2) пен мексикалық Иманол Родригес (5–0) октагонда кездеседі.
