Ауқымды музыкалық шоу Қазақстан тарихындағы ең ірі мәдени шаралардың біріне айналды.
30 тамыз күні Қарағандыдағы Тәуелсіздік алаңында бұрын-соңды болмаған ауқымды музыкалық шоу ұйымдастырылды. Шахтерлер күніне орай Qarmet компаниясы өткізген концертке алдын ала деректер бойынша 120 мыңнан астам адам жиналды. Бұл – Қарағанды тарихындағы ғана емес, бүкіл Қазақстандағы ең ірі мәдени шара ретінде рекорд орнатты.
Кеште қазақстандық танымал орындаушылар AYAU, SADRADDIN, Ирина Қайратовна және Қарағандыға алғаш рет келген ресейлік жұлдыз Zivert өнер көрсетті. Әншілердің әсерлі қойылымы алаңға жиналған жүздеген мың көрерменнің көңілін бір арнаға тоғыстырды.
Zivert сахнадан шахтерлерді ерекше ықыласпен құттықтады:
«Қарағанды, қайырлы кеш! Осынша көп адам алдында алғаш рет өнер көрсетіп тұрмын. Сіздермен бірге болу – үлкен қуаныш. Баршаңызды мерекемен құттықтаймын», – деді ол.
Кеш соңында Қарағанды аспанында отшашу атылып, көрермендерге ерекше әсер сыйлады.
