UFC жартылай орта салмақ рейтингінде үшінші орында тұрған қазақстандық файтер Шавкат Рахмонов Қостанайға ат басын бұрды.
«Arlan MMA Kostanay» командасының негізін қалаушы Жарасхан Саматов Instagram желісінде Шавкаттың Қостанайдағы сапарынан бірнеше сторис жариялады. Сол видеолардың бірінде Рахмоновқа ет әкелінген сәттегі тосын реакциясы көпшілікті күлкіге қарық қылды.
Сонымен қатар қостанайлықтар Шавкатқа ерекше құрмет көрсетіп, оған жылқы сыйлады. Бұл – қазақ дәстүрінде ең үлкен құрметтің бірі.
Айта кетейік, бұған дейін бапкері Эдуард Базров шәкіртінің екі уақыттық жаттығуларға кіріскенін айтқан болатын. Шавкаттың октагонға оралуы 2026 жылдың басына жоспарланғанымен, 2025 жылдың соңына дейін жекпе-жек өткізу ықтималдығы да бар.
