«Қайрат» ФК 18 жастағы қақпашысы Шерхан Қалмырза Чемпиондар лигасындағы алғашқы ойынында сынға түсті. Матчтан кейін анасы Сәуле Рабаева ұлын қолдап, жүрекжарды сөздер айтты.
Сәуле Рабаева әлеуметтік желіде ұлына арнаған жазбасында былай деді:
«Сен – ең үздіксің, ұлым! Сен – менің мақтанышымсың. Қолыңнан келгеннің бәрін жасадың. Мен үшін сен ең мықтысың. Жүрегім, алда сені үлкен биіктер күтіп тұр. Берілме. Әрқашан жаныңдамын. Саған сенемін. Әрқашан сеніп келемін».
Бұл сөздер жас қақпашының жанкүйерлері арасында кең қолдау тапты.
Еске сала кетейік, кеше «Қайрат» Чемпиондар лигасының топтық кезеңіндегі алғашқы ойынын өткізді. Алматы командасы португалиялық «Спортингке» жол берді.
Қақпаға командадағы үшінші нөмірлі қақпашы — небәрі 18 жастағы Шерхан Қалмырза шықты. Ол матч басында пенальтиді қайтарып, жанкүйерлерді қуантты. Алайда кейін төрт гол жіберіп алды.
Соған қарамастан Шерханның керемет сейві Чемпиондар лигасының бірінші турындағы үздік бес сейвтің қатарына енді. Бұдан бөлек, ол турнир тарихындағы ең жас қақпашылардың бірі атанды.
