"Армандар орындалады": Kalifarniya Қайрат Нұртаспен бірге жаңа ән жазды
Қазақ эстрадасында тың дуэт пайда болды.
Көптен бергі арман орындалды
Қазақстандық әнші Фархат Қалиев, көпшілікке Kalifarniya лақап атымен танымал өнер иесі, тыңдармандарына жаңа музыкалық жаңалық ұсынды. Ол бұл жолы елге танымал эстрада жұлдызы Қайрат Нұртаспен бірлесіп ән жазғанын мәлімдеді.
Жаңа туынды “Ademi»” деп аталады. Бұл дуэт әлеуметтік желіде бірден қызу талқыланып, тыңдарманның назарын аударды. Өнер иесінің айтуынша, Қайрат Нұртаспен бірге ән орындау — оның көптен бергі армандарының бірі болған.
Әнші бұл жаңалығын жанкүйерлеріне жариялап, жаңа шығарманың толық нұсқасы жуырда орындалатынын жеткізді. Оның сөзінше, аталған ән алғаш рет Алматы Аренада өтетін концертте шырқалады.
Қайрат Нұртас концерт қонақтарының қатарында болады
Айта кетейік, 4 сәуірде Kalifarniya Алматыда жеке концертін өткізеді. Кеш қонақтарының қатарында Қайрат Нұртас та бар. Осыған байланысты жанкүйерлер сахнада қос жұлдыздың бірге өнер көрсетуін ерекше күтуде.
Жаңа әннің үзіндісі жарияланғаннан кейін тыңдармандар әлеуметтік желіде пікір қалдырып, қос өнерпаздың шығармашылық әріптестігіне оң бағасын берді.
Көпшілік бұл дуэтті қазақ шоу-бизнесіндегі сәтті коллаборациялардың бірі деп атап, әннің мағынасына, орындалуына және әртістердің үндестігіне назар аударды.