B12 дәрумені: Ми мен қанға қажетті “алтын” компонент

B12 немесе кобаламин, ағзамыздың қалыпты жұмысын қамтамасыз ететін маңызды дәрумендердің бірі. Ол жүйке жүйесінің саулығына, қан түзу процесіне және энергия алмасуына тікелей әсер етеді.

B12-нің ағзадағы рөлі

Негізгі функциялары:

• Қан түзу – эритроциттердің түзілуіне қатысады, анемияның алдын алады.
• Жүйке жүйесін қорғау – миелин қабығын түзу арқылы жүйке талшықтарын қорғайды, жүйке импульстарының берілуін жақсартады.
• Зат алмасу – майлар мен көмірсуларды энергияға айналдыруға көмектеседі.
• ДНҚ синтезі – жасушалардың өсуі мен қалпына келуінде маңызды рөл атқарады.

Ересектерге тәулігіне шамамен 2–3 мкг, ал жүкті және емізулі әйелдерге 7,6 мкг-қа дейін В12 қажет.

B12 дәрумені бар негізгі өнімдер

B12 дәрумені негізінен жануар тектес тағамдарда кездеседі. Міне, оның ең бай көздері:

1. Субөнімдер: Бауыр В12 ең бай көздердің бірі: 100 г сиыр бауырында тәуліктік нормадан бірнеше есе көп – 70,7 мкг бар.
2. Ет және құс еті: Сиыр және шошқа еті, тауық еті күнделікті рационыңызда болса, В12 деңгейін тұрақты ұстап тұруға көмектеседі.
3. Балық және теңіз өнімдері: Туна балығы, албырт, мидия – дәруменнің өте жақсы көздері, сонымен қатар омега-3 май қышқылдарына бай.
4. Жұмыртқа және сүт өнімдері: Жұмыртқа, сүт, сүзбе және ірімшік ет өнімдерін аз тұтынатын адамдар үшін жақсы қосымша көз болып табылады.

B12 тапшылығын толтырудың қосымша жолы

Кей жағдайларда тағамнан ғана жеткілікті мөлшерде B12 дәруменін алу қиын болуы мүмкін. Әсіресе, бұл вегетариандық немесе вегандық диета ұстанатын адамдарға, сондай-ақ асқазан-ішек жолының сіңіру қабілеті төмендеген жандарға тән. Мұндайда дәрігерлер биологиялық белсенді қоспаларды (ББҚ) немесе дәрумен кешендерін ұсынады.

Маңызды:

• ББҚ таңдағанда құрамында метилкобаламин немесе цианкобаламин түріндегі B12 бар өнімдерді іздеңіз.
• Дозаны тек дәрігердің кеңесімен анықтаңыз – артық қабылдау ағзаға пайда әкелмейді.
• Сертификатталған және сапасы тексерілген өндірушілерді таңдаңыз.

ББҚ – дұрыс тамақтанудың орнын баспайды, бірақ B12 тапшылығын толтырудың тиімді қосымша тәсілі бола алады.