Жүрекке табиғи қорған: холестеринді төмендететін жеміс–жидектер

Неге жеміс–жидектер холестеринді азайтады?

Жеміс–жидектер – тек дәрумен емес, LDL ("жаман") холестеринді төмендететін табиғи құрал. Доктор Саша Соррентиноның айтуынша, жеміс–жидектердегі еритін талшықтар, әсіресе пектин, ішекте өт қышқылдарына байланып, оларды ағзадан шығарады. Ал бауыр жаңа өт қышқылдарын жасау үшін қандағы холестеринді пайдаланады. Нәтижесінде LDL деңгейі төмендейді.

LDL: "жаман" холестериннің қауіпті жағы

LDL ағзаға қажет болса да, ол тотығып кеткен жағдайда артерия қабырғаларына жиналып, атеросклероз қаупін арттырады.

Мұнда жеміс–жидектер тағы да көмекке келеді:

• Флавоноидтар мен фитостеролдар бос радикалдарды тежейді;
• Қабынуды азайтады;
• Тамырдың серпімділігін сақтайды.

Қай жеміс–жидектер ең пайдалы?

Соррентино жеміс–жидектерді тұтас күйінде, қабығымен жеуді ұсынады – дәл сол кезде әсері күшейеді.

• Алма – пектин мен кверцетин LDL-ді төмендетеді.
• Апельсин, грейпфрут – талшық пен гесперидин тамырды қорғайды.
• Жидектер (құлпынай, көкжидек, қарақат, таңқурай) – антоциандар LDL тотығуын тежейді.
• Авокадо – пайдалы майлар холестерин балансын жақсартады.
• Қызыл жүзім – резвератрол жүрекке қалқан болады.
• Алмұрт – пектин қант пен майдың сіңуін баяулатады.

Қалай және қашан жеу керек?

Доктор Соррентино кеңес береді:

• Жеміс–жидектерді күніне кем дегенде екі рет жеу қажет – таңғы аста және жеңіл тіскебасар ретінде.
• Порция көлемі әр адамның мақсатына қарай өзгереді: салмақ тастау, қалыпты ұстау немесе бұлшықет массасын арттыру.
• Банан мен киви – спортпен белсенді айналысатындар үшін таптырмас жеміс–жидек. Ондағы табиғи қант, калий мен С дәрумені энергия береді.
• Жасыл алма мен жидектер – демалыс күндері, аз қимылдаған кезде қолайлы.
• Жеміс–жидектерді жеудің уақыты да жеке ерекшелікке байланысты: біреуіне таңертең пайдалы болса, енді біреуіне түстен кейін тиімді. Бұл көбіне метаболизм мен қантқа ағзаның реакциясына байланысты.
• Ең бастысы – жеміс–жидектерді жалғыз емес, өсімдік ақуызымен бірге жеу, сонда қандағы қант күрт көтерілмей, баяу әрі тұрақты сіңеді. 

Шырынға алданып қалмаңыз

Өндірістік шырындар – пайдалы жеміс–жидектің баламасы емес.
Қосымша қант LDL-ді азайтпайды, керісінше, холестеринді арттырып, қабынуды күшейтеді. Сондықтан шырынды шектеп, жеміс–жидектерді тұтас күйінде жеген дұрыс.

Жеміс–жидектер – қолжетімді әрі дәмді профилактика. Олар LDL-ді азайтып, HDL ("жақсы") холестеринді арттырады, қан тамырларын қорғайды. Бірақ басты шарт – дұрыс тамақтануды белсенді өмір салтымен үйлестіру.