Ресейдің Красноярк өлкесінде өткен футбол матчында Артур Иксанов есімді төреші ойын барысында кенеттен қайтыс болды.
"Металлург" футбол клубы өздерінің "ВКонтакте" желісіндегі ресми парақшасында қайғылы хабарды растады:
“Досымыз әрі тамаша адам, Артур Равильевич Иксановтың өмірден өткенін үлкен қайғымен хабарлаймыз. Ол футболшы және төреші ретінде жарқын із қалдырды. Оның футболға деген махаббаты мен адалдығы көпшілікке үлгі болды”, – делінген хабарламада.
SHOT басылымының мәліметінше, 45 жастағы Артур Иксанов Ачинск қаласындағы "Строитель" стадионында, Жеңістің 80 жылдығына арналған турнирде қызмет еткен.
Белгілі бір сәтте төреші өзін нашар сезініп, есінен танып, алаңға құлап түскен. Дәрігерлер бес минут ішінде оқиға орнына жетіп, алғашқы көмек көрсеткенімен оның өмірін сақтап қалу мүмкін болмады.
Алдын ала болжам бойынша, Иксановтың өліміне жүрек тоқтауы себеп болған.
Артур Иксанов үш баланың әкесі еді. Оның кенеттен өмірден өтуі отбасына, әріптестеріне және футбол қауымдастығына үлкен қайғы әкелді.
Айта кетсек, жуырда Оңтүстік Африканың "Дурбан Сити" клубының футболшысы Синамандла Зонди де матч алдында есінен танып, ауруханаға жеткізілген соң көз жұмды. 22 жастағы жас ойыншыны аман алып қалу мүмкін болмады.
