"Манчестер Ситидің" қорғаушысы Абдукодир Хусановтың агенті Гайрат Хасбиуллин бұқаралық ақпарат құралдарында кеңінен тараған оқиғаға қатысты ресми мәлімдеме жасады.
Наурыз айының соңында команданың жаттығуынан кейін бас бапкер Пеп Гвардиола Хусановқа: "Сен чемпионсың!" — деп жылы лебіз білдіргені туралы жазылған еді. Алайда футболшы ағылшын тіліндегі "champion" сөзін қате түсініп, "шампунь" деп жауап берген. Бұл сөз Гвардиоланың шашсыз екеніне қатысты қалжың ретінде қабылданып, әлеуметтік желіде кеңінен таралды.
Бірақ Гайрат Хасбиуллин бұл жағдайдың шындыққа жанаспайтынын мәлімдеді:
"Мұндай оқиға болған жоқ. Бұл ақпараттың бәрі — жалған", — деді агент.
Абдукодир Хусанов 2025 жылдың қаңтарында "Манчестер Ситимен" келісімшартқа қол қойып, ағылшын Премьер-лигасында ойнайтын алғашқы өзбек футболшысы атанды. Келісім 2029 жылға дейін күшінде. БАҚ мәліметінше, трансфер сомасы 40 миллион еуроға жетіп, бонуссыз есептелген.
