Барселонаның" 17 жастағы супержұлдызы атаған ойыншыны клуб жанкүйерлері аса жақтырмайды.
"Барселонаның" жарқыраған жұлдызы Ламин Ямаль өзіне шабыт беретін футболшыларды атады. Алайда олардың бірі каталондық жанкүйерлерге ұнамайды. Бұл туралы Diario Sport басылымы хабарлады.
17 жастағы испан вундеркинді қазіргі таңда Еуропаның басты футбол үміттерінің бірі. Биылғы маусымда футболшы керемет ойын өрнегін көрсетіп келеді.
«Егер "Барселонаны" есептемесек, мен үшін үздіктер — Усман Дембеле мен Букайо Сака. Екеуі де тамаша ойын көрсетіп жүр», — деді Ямаль Diario Sport-қа берген сұхбатында.
Каталондық жанкүйерлер Букайо Сакаға бейтарап қараса, Усман Дембелеге қатысты көзқарасы мүлде басқа. Француз футболшысы 2017 жылы 105 миллион еуроға сатып алынғанымен, "Барсада" жарақаттардан көз ашпай, үмітті ақтай алмады.
2023 жылы ол күтпеген жерден "ПСЖ"-ға небәрі 40 миллион еуроға ауысып, бапкер Хавидің сенімін аяқасты еткен. Оның үстіне өткен маусымдағы Чемпиондар лигасында париждіктер бұрынғы клубын жарыстан шығарып, Дембеленің мысқылдай күлген сәті көпшіліктің есінде қалған.
Дегенмен, Дембеленің қазіргі маусымдағы ойынына баға бермеу мүмкін емес. Ол ПСЖ-мен бірге тарихтағы алғашқы Чемпиондар лигасын жеңіп алуға жақын, сондай-ақ "Алтын допқа" басты үміткерлердің бірі саналады. Егер париждік команда кубокты ұтса, Дембеле тіпті Ламин Ямальдан да озып кетуі мүмкін.
Ламин Ямаль бұл маусымда:
Испания Кубогын жеңді
Ла Лига чемпионы атануға жақын
39 нәтижелі әрекет жасады (15 гол + 24 пас)
17 жаста ғана
