Енді мадридтік жұлдыздар матч алдындағы барлық шараларға әлемдік сән үйінің эксклюзивті киімімен шығады
Атақты француз бренді енді мадридтік клубтың ресми серіктесі. «Реал» ойыншылары эксклюзивті киім-кешектермен сахнаға шығатын болды.
«Реал» мен әлемге әйгілі сән үйі Louis Vuitton көпжылдық серіктестік туралы ресми түрде жариялады. Бұл келісім аясында француз бренді корольдік клубтың ресми киім жеткізушісіне айналады.
LV-дің эксклюзивті костюмдері, аксессуарлары, чемодандары мен сөмкелері енді «Реал» ойыншыларының сәнді келбетін қалыптастырады.
«Реал» футболшылары тек алаңда ғана емес, ресми іс-шаралар мен сапарлар кезінде де Louis Vuitton киімдерімен көзге түсетін болады. Клубтың имиджі сән әлемінде жаңа сатыға көтеріліп отыр.
Айта кетейік, клуб жұлдызы Джуд Беллингем былтырдан бері Louis Vuitton-ның ресми бет-бейнесі болған. Енді оған бүкіл команда қосылып отыр.
Бұған дейін де «Реал Мадрид» ірі матчтарға шығарда ерекше аурасымен танымал еді. Енді Louis Vuitton костюмдерінде бұл әсер одан сайын күшейетіні анық. Мұндай симбиоз — футбол мен сәннің шынайы тоғысуы.
