Колумбия чемпионатының финалы нағыз спорттық драмамен аяқталды. "Санта-Фе" мен "Индепендьенте Медельин" арасындағы шешуші кездесуде басты кейіпкер — ардагер шабуылшы Уго Родальега болды.
Жанкүйерлер Родальеганы Англиядағы “Фулхэм” мен “Уиган”, сонымен бірге Түркия чемпионатындағы ойынымен жақсы таниды. Бірақ бұл жолы өз елінде, туған топырағында нағыз ержүректік көрсетті.
Матчтың 77-минутында есеп 1:1 болған сәтте Родальега ауыр жарақат алып, алаңнан шығуға бел буған еді. Бірақ әріптестері шабуылшыны қоршап алып, алаңда қалуын өтінді. Бірнеше ойыншы оған рух беріп, соңына дейін күресуге шақырды. Уго көзіне жас алып, райынан қайтып ойынды жалғастырды.
Жарақатына қарамастан Родальега қарсылас жарты алаңында допқа иелік етіп, оны қапталға жеткізді де өзі шабуылға қосылды. Ақсаңдап айып алаңына жетіп, әріптесінің пасын керемет соққымен қақпаға бағыттады. Доп қақпа тіреуінен ішке енді.
Гол соққаннан кейін Уго бір аяғымен жүгіріп барып, құлап қалды. Ойыншылар оны құшақтап жатқанда, дәрігерлер бір мезгілде алғашқы көмек көрсетті.
Бұл гол “Санта-Фе” клубы үшін тек жеңіс емес, 2016 жылдан бері алғашқы чемпиондық атаққа жол ашты. Родальеганың ерлігі — Колумбия футболының тарихына алтын әріппен жазылды.
