Жас талант Семейге ауысып, тарихи клубтың қайта жандану жолындағы жаңа жобасына қосылды.
Қазақстандық жас футболшы Ғалымжан Кенжебек кәсіби мансабын Семейдің "Елімай" клубында жалғастырады. Бұл туралы команда клубтың әлеуметтік желідегі ресми парақшасында хабарлады.
“Алашқа аты әйгілі жазушы Мұхтар Әуезов доп тепкен Семейге қош келдің!” — делінген клубтың жазбасында.
Футбол жанкүйерлеріне жақсы таныс Кенжебек — Қазақстан футболының болашағынан үміт күттіретін дарынды ойыншылардың бірі. Ол орта алаңдағы шапшаңдығы мен пас беру шеберлігімен көзге түсіп жүрген ойыншы.
Ғалымжан Кенжебек өзінің кәсіби мансабын "Қайраттың" жастар құрамында бастаған.
22 жастағы футболшы өткен маусымды елордалық "Жеңіс" сапында бастады. Жазда Кипрдің екінші дивизионында өнер көрсететін «Акритас Хлоракас» клубына ауысты. Аталған командада отандасымыз 13 матч өткізіп, 4 гол соқты. Бір нәтижелі пас берді.
Бұдан бөлек, ұлттық құрамасының жартылай қорғаушысы Словакияның “Кошице” клубында доп тепті.
