Сауд Арабиясының егеменді қоры клуб жұлдызын осы жазда сатпайтынын кесіп айтты.
Ағылшын Премьер-лигасындағы "Ньюкасл" клубы швед шабуылшысы Александер Исактың "Ливерпульге" ауысуына рұқсат бермеді. Бұл туралы The Telegraph хабарлады.
Клубтың иесі — Сауд Арабиясының егеменді қоры — жағдайға тікелей араласып, Исакқа бұл жазда командадан кетпейтінін хабарлаған. "Сент-Джеймс Парк" басшылығы тіпті жаңа шабуылшы сатып алса да, Исактың "Ливерпульге" өтуіне келісім бермейтінін мәлімдеген.
25 жастағы футболшы өзінің кеткісі келетінін ашық айтқаннан кейін негізгі командамен жаттығудан шеттетілген. Бұған дейін "Ливерпуль" швед бомбардирі үшін 110 млн фунт стерлинг + бонус көлемінде ұсыныс жасаған, алайда "Ньюкасл" бұл ұсынысты дереу кері қайтарды.
The Telegraph дерегінше, Исак осы жағдайға көніп, клубтағы болашағын қабылдағаннан кейін ғана қайтадан құрам сапында өнер көрсетеді. "Ливерпуль" тарапынан екінші ұсыныс жасалуы мүмкін деген ақпарат та бар, бірақ саудиялық қожайындардың ұстанымы қатаң болып отыр.
