Үкімет қазан айына дейін барлық кәсіби клубтарды жекешелендіру жоспарын дайындауды тапсырды.
Қазақстан Премьер-министрі Олжас Бектенов елдегі футбол клубтарын жекешелендіру бойынша нақты тапсырма берді. Үкімет жекеменшікке беруді жеделдетіп, қазан айына дейін нақты жоспар әзірлеуі тиіс.
Үкіметтің ресми телеграм-арнасында жарияланған ақпаратқа сәйкес, Бектенов Туризм және спорт министрлігіне өңірлермен бірлесіп футбол клубтарын жекешелендіру жоспарын қазан айының 1-іне дейін дайындауды міндеттеді.
Бұл шешім кәсіби футболды қаржыландырудағы мемлекеттік тәуелділікті азайтып, клубтардың жаңа даму кезеңіне өтуіне жол ашуы мүмкін.
Бұған дейін Мемлекет басшысы Қасым-Жомарт Тоқаев халыққа Жолдауында спорт саласын реформалау қажеттігін атап өткен болатын. Ол кәсіби спортты тек әлеуметтік құбылыс ретінде емес, миллиардтаған табыс әкелетін бизнес-индустрия ретінде қарастыруға шақырды.
Тоқаевтың пікірінше, футбол клубтарын жекешелендіру — Қазақстанда футболды жаңа деңгейге шығаратын маңызды қадам.
Кейбір сарапшылар бұл қадам футболды дамытудың тиімді тетігі екенін айтады. Өйткені бизнеске берілген клубтар қаржыға жауаптырақ болады, маркетинг пен инфрақұрылымға көбірек көңіл бөледі.
Алайда сыншылар «жекешелендіруден кейін клубтар әлеуметтік миссиядан алшақтап, тек пайдаға жұмыс істеп кетпей ме?» деген сұрақты да алға тартып отыр.
