Қазақстан Премьер-лигасының 9-турынан шегерілген кездесуде «Тобыл» өз алаңында «Ордабасыны» қабылдап, 1:0 есебімен жеңіске жетті.
Қостанайлықтар алғашқы минуттардан-ақ қысым жасай бастады. Марко Вукчевич айып добынан қақпа бағанын шайқалтқан соң, Улар Жақсыбаев қолмен ойнады. Нәтижесінде төреші пенальти белгіледі.
14-минутта Ислам Чесноков он бір метрлікті сәтті орындап, есеп ашты.
Қонақтар таразы басын теңестіруге тырысқанымен, қауіпті сәт жасай алмады. Екінші таймда да ойын мәнері өзгермей, матч осы есеппен аяқталды.
Жеңістен кейін «Тобылдың» еншісінде – 47 ұпай, клуб турнир кестесінде үшінші орында келеді. Ал «Ордабасы» 31 ұпаймен жетінші сатыда қалды.
«Тобыл» (Қостанай) — «Ордабасы» (Шымкент) 1:0 (1:0)
Гол: Чесноков (пенальти, 14’).
