Қазақстан Бірінші лигасының 26-турында күтпеген сәт тіркелді. «Қайрат-Жастар» қақпашысы Шерхан Қалмырза алаң ортасынан соғылған допты өткізіп алды.
Матч Алматыда өтіп, жергілікті «Қайрат-Жастар» өз алаңында астаналық «SD Family» клубын қабылдады. Кездесу қожайындардың айқын жеңісімен — 5:1 есебімен аяқталды.
Алайда ойынның 83-минутында қонақтар сапындағы Артур Дадаханов ерекше соққысымен көзге түсті. Ол алаң ортасынан тура қақпаға бағыттаған добын дәл түсіріп, қақпашының қателігін шебер пайдаланды. Осы сәт әлеуметтік желілерде қызу талқыланып жатыр.
Маусым қорытындысы бойынша «Қайрат-Жастар» Бірінші лига турнир кестесінде 40 ұпаймен алтыншы орынды иеленді.
