«Реал» мен «Барселона» арасындағы шиеленісті матчтан кейін эмоциялар басылмай, ойыннан соң да өршіп кетті.
«Сантьяго Бернабеуде» мадридтік клубтың шабуылшысы Винисиус Жуниор мен каталондықтардың 18 жастағы вингері Ламин Ямал арасында сөз таласы туындады. Камералар бразилиялық ойыншының жас қарсыласына жақындап келіп, қатқыл түрде былай дегенін түсіріп алды:
«Сен тым көп сөйлейсің. Қазір айтшы, не дейсің?!»
Бұл оқиға матч аяқталғаннан кейін, футболшылар дәлізге беттеген сәтте болған. Осы кезде екі команданың ойыншылары арасында кішігірім қақтығыс та орын алды.
Қызығы, Винисиустың өзі де эмоцияға берілгіш, қарсыластарымен жиі сөзге келетін ойыншы ретінде танылған.
Еске салайық, аяқталған ойында «Реал» «Барселонаны» 2:1 есебімен жеңді.
Жеңіс голын 43-минутта Джуд Беллингем соқты, ал Килиан Мбаппе екінші таймда пенальтиден мүлт кетті.
Бұл жеңіс арқылы мадридтіктер Ла Лига турнир кестесінде каталондықтардан бес ұпайға алға шықты.
