Мадридтік «Реал» мен Бельгия құрамасының қақпашысы Тибо Куртуаның алдағы Қазақстанға қарсы матчқа қатыспайтыны белгілі болды.
Журналист Родраның мәліметінше, «Реалдың» негізгі қақпашысы Тибо Куртуа соңғы матчта жарақат алған.
«Кеше өткен “Райо Вальеканоға” қарсы ойында Куртуа оң жамбасынан жарақат алып, кездесуді ауырсынумен аяқтады. Қазір ол Валдебебас базасында медициналық тексеруден өтуде. Алдын ала мәлімет бойынша, футболшының бұлшықеті созылып кеткен», — деп хабарлайды Madrid Universal.
Куртуа жарақатына байланысты Бельгия сапында Қазақстанмен (15 қараша) және Лихтенштейнмен (18 қараша) өтетін матчтарды өткізіп алады.
Клубтан ресми мәлімдеме әзірге шықпағанымен дәрігерлік қорытынды расталған жағдайда Куртуа бірнеше апта бойы алаңға шыға алмайды.
Айта кетейік, Бельгия құрамасының тағы екі көшбасшысы — Кевин Де Брюйне мен Ромелу Лукаку да жарақатына байланысты Астанаға ұшып келмейді.
