Клуб өкілдері ресми мәлімдеме жасады.
Жезқазғандық «Ұлытау» футбол клубы бапкерлер мен қызметкерлерге жалақының кешіктірілуіне байланысты тараған ақпаратқа қатысты ресми түсініктеме берді.
Клуб мәлімдемесінде қаржылық қамтамасыз ету екі негізгі көзден қалыптасатыны аталып өтті. Атап айтқанда, бюджеттік қаражат пен демеушілік қолдау.
Клуб басшылығы бюджет есебінен бөлінген қаражаттың толық көлемде игерілгенін хабарлады.
«Бюджет тарапынан қаржыландыру жөніндегі міндеттемелер толық орындалды, қарастырылған қаражат толықтай игерілді. Қазіргі таңда қалыптасқан берешекті демеушілік түсімдер есебінен өтеу жоспарланып отыр. Осы бағытта тиісті жұмыстар жүргізілуде», — делінген клубтың ресми мәлімдемесінде.
«Ұлытау» өкілдерінің айтуынша, қазіргі уақытта жалақыға қатысты қарызды өтеу үшін демеушілермен келіссөздер жүргізіліп жатыр. Клуб бұл мәселенің жақын арада шешілетініне сенім білдірді.
Айта кетейік, өткен маусымда «Ұлытау» Қазақстан Премьер-лигасында 10-орын иеленіп, 23 ұпай жинады.
