Қазақстанда халықаралық стандартқа сай кезекті стадион салынады

Жаңа арена: 12 мың орын және үш жылдық жоба

Атырауда 12 мың көрерменге арналған жаңа стадионның құрылысын бастау жоспарланып отыр. Бұл мәліметті баспасөз брифингінде облыстық құрылыс, сәулет және қала құрылысы басқармасының басшысы Нұрберген Құсайынов жеткізген.

Оның айтуынша, жоба үш жылға есептелген.

"Мұнайшы" стадионы да жаңарады

Жаңа аренаның құрылысымен қатар "Мұнайшы" стадионы да күрделі жөндеуден өтеді. Бұл алаңда Қазақстан Премьер-лигасында ойнайтын "Атырау" үй матчтарын өткізеді.

Қайта жаңғырту аяқталғаннан кейін стадионның сыйымдылығы 8 мыңнан аса көрерменге дейін ұлғаяды. Нысанның жобалық-сметалық құжаттамасы толық дайын екені айтылды.

Қазақстанда стадиондар көбейіп жатыр

Еске салайық, Қазақстанда футбол инфрақұрылымын жаңарту мен жаңа ареналар салу бойынша бірнеше жоба қатар жүзеге асуда. Қазір Алматы, Шымкент, Ақтөбе, Атырау, Ақтау және Көкшетауда жаңа стадиондар әртүрлі кезеңде қолға алынған.

Негізгі жоспарланған жобалар:

• Алматы: Құлжа және Талғар тракттары арасында 35 000 орындық стадион салу көзделген (аяқталуы 2027–2028 жылдарға жоспарланған). Қаланың Орталық стадионы сақталып, жаңғыртылады.
• Шымкент: 35 000 орындық стадион құрылысы 2025 жылы басталған.
• Ақтөбе: "Алтын Орда" шағынауданында 34 980 орындық жаңа арена құрылысы 2025 жылдың соңында басталып, 2028 жылға дейін аяқтау жоспарланған.
• Ақтау: 10–11 мың орындық стадионның жобасы 2025 жылы сараптамадан өткен, құрылысты 2026 жылы бастау көзделген.
• Көкшетау: өңірлік бағдарламалар аясында 10 000 орындық арена жоспарланған.