"Реал" жанжал туралы ақпарат таратқан ойыншыны анықтады
Мадридтік "Реал" команда ішіндегі ақпаратты журналистерге жеткізіп отырған футболшылардың бірін анықтаған болуы мүмкін.
Испаниялық дереккөздердің мәліметінше, күдік жартылай қорғаушы Дани Себальосқа түскен. Айтуларынша, дәл осы ойыншы Орельен Тчуамени мен Федерико Вальверде арасындағы кикілжің туралы БАҚ өкілдеріне егжей-тегжейлі мәлімет берген.
Жанжал қалай басталған?
Даулы оқиға "Реалдың" жаттығу базасында болған. Бұған дейін команда ішіндегі екі футболшы арасында бірнеше рет түсініспеушілік туындағаны хабарланған.
Соңғы жанжал киім ауыстыратын бөлмеде төбелеске ұласқан деген ақпарат тарады. Сол эпизодтардың бірінде Вальверде құлап, басын үстелге соғып алған. Нәтижесінде уругвайлық жартылай қорғаушының бас сүйек-ми жарақатын алғаны және жарақатына тігіс салынғаны айтылды.
Перес шұғыл жиналыс өткізді
Оқиғадан кейін "Реал" президенті Флорентино Перес шұғыл жиналыс өткізген. Клуб екі ойыншыға да тәртіптік шара қолданды.
Мәлімет бойынша Тчуамени мен Вальверде әрқайсысы 500 мың еуро көлемінде айыппұл төлеген. Сонымен қатар клуб ішкі тәртіптік іс қозғағанымен мәселе қаржылай санкциямен шектелген.
Вальверде төбелес болғанын жоққа шығарды
Федерико Вальверде кейінірек төбелес туралы ақпаратты жоққа шығарып, жарақатты кездейсоқ алғанын айтқан.
Ал Орельен Тчуамени оқиғаның болғанын мойындап, команда алдында кешірім сұраған және клуб белгілеген жазамен келіскен.
Вальверде "Барселонаға" қарсы матчты өткізіп алды
Жарақатына байланысты Вальверде 10 мамырда "Барселонаға" қарсы класикоға қатыса алмады. Ал Тчуамени бұл кездесуде алаңға шықты.
Айта кетейік, бұл жағдайдан кейін мадридтік клуб ішінде ақпараттың сыртқа тарауына қатысты тексеріс күшейген. Клуб басшылығы ойыншылардың ішкі тәртіпті сақтауы мен команда құпиясын жария етпеуін қатаң бақылауға алған.