Хаби Алонсо Англияға аттанғалы жатыр
Испаниялық маман “Челси” клубының жаңа бас бапкері болуы мүмкін.
Лондондық “Челси” клубы бас бапкер қызметіне Хаби Алонсоны тағайындауға жақын. Испаниялық маман ағылшын клубымен келісімге келгені хабарланды.
TEAMtalk мәліметінше, соңғы күндері тараптар арасындағы келіссөздер айтарлықтай алға жылжыған. “Челси” басшылығы Алонсоны Лиам Росеньордың орнына негізгі үміткер ретінде қарастырып отыр.
Дереккөз ақпаратына сүйенсек, клубтың спорттық басшылығы Хаби Алонсоның кандидатурасын бірауыздан қолдайды. Лондондықтар испаниялық маманды ұзақмерзімді жобаға лайық бапкер деп санайды.
Бұған оның тактикалық көзқарасы, ойын құрылымын қалыптастыру қабілеті және жоғары деңгейдегі тәжірибесі себеп болып отыр. Алонсо бұған дейін “Байер” және “Реал” жүйесінде жұмыс істеп, еуропалық футболдағы сұранысқа ие мамандардың біріне айналған.
Ресми хабарлама әзірге шыққан жоқ
Қазіргі таңда келісім толық аяқталған жоқ. Тараптар Алонсоның клубтағы спорттық құрылыммен қалай жұмыс істейтінін және басқару жүйесіндегі рөлін талқылап жатыр.
Сондықтан “Челси” жаңа бас бапкер туралы ресми мәлімдеме жасаған жоқ. Дегенмен келіссөздердің қарқынына қарағанда, Алонсоның Лондон клубына келуі ықтимал сценарийлердің бірі болып тұр.
Алонсоны “Ливерпульмен” де байланыстырған
Бұған дейін испаниялық маманның есімі “Ливерпульмен” де қатар аталған еді. Алонсо ойыншы кезінде мерсисайдтық клуб сапында өнер көрсеткендіктен, оның Англияға қайта оралуы туралы ақпараттар жиі талқыланып келген.
Алайда қазіргі жағдайда “Челси” Алонсоны өз жобасының басты тұлғасына айналдыруға ниетті.