ӘЧ-2026: Конго жанкүйерлері АҚШ аумағына өте алмауы мүмкін

2026 жылғы футболдан әлем чемпионаты алдында Конго Демократиялық Республикасына қатысты мәселе туындады. Елде Эбола індетінің таралуына байланысты Конго құрамасының жанкүйерлері АҚШ-та өтетін матчтарға қатыса алмауы мүмкін. 

Десе де, футболшыларға турнирге қатысуға рұқсат беріледі деп күтілуде. Алдын ала ақпаратқа сәйкес, Конго құрамасының ойыншылары АҚШ, Канада және Мексика аумағына кіре алады. Тіпті кейбір футболшылардан вирусқа қатысты оң тест нәтижесі анықталған жағдайда да, команда мүшелеріне арнайы тәртіппен турнирге қатысуға мүмкіндік берілуі ықтимал.

Бұл шешім ұлттық құрамалардың жарысқа толыққанды қатысуын қамтамасыз ету мақсатында қарастырылып отыр.

Жанкүйерлерге шектеу қойылуы мүмкін

Алайда Конго жанкүйерлері үшін жағдай күрделірек. Politico, CNN және басқа да ақпарат көздерінің мәліметінше, АҚШ-та Эбола вирусының таралу қаупіне байланысты санитарлық талаптар күшейтілген.

Қазіргі шектеулер бойынша соңғы уақытта Уганда, Конго Демократиялық Республикасы немесе Оңтүстік Судан аумағында болған шетел азаматтарының АҚШ-қа кіруіне тыйым салынған.

Әлем чемпионаты басталғанға дейін бұл тыйым алынып тасталса да, Конго жанкүйерлерінің матчтарға қатысуы екіталай. Себебі АҚШ-қа келгеннен кейін олар бірнеше апта карантиннен өтуге міндеттелуі мүмкін.

ӘЧ-2026 үш елде өтеді

2026 жылғы әлем чемпионаты АҚШ, Канада және Мексикада ұйымдастырылады. Турнир тарихта алғаш рет үш елде өтіп, оған 48 ұлттық құрама қатысады.