Президенттің батасы, ән мен жыр: Өзбекстан футболшылары ӘЧ-2026-ға аттанды
2026 жылғы әлем чемпионаты АҚШ, Канада және Мексикада өтеді. Өзбекстан құрамасы мундиальде Португалия, Колумбия және Конго құрамаларымен кездеседі.
Өзбекстан ұлттық құрама футболшыларын 2026 жылғы әлем чемпионатына ерекше салтанатпен шығарып салынды. 22 мамыр күні Ташкенттегі "Бунёдкор" стадионында жанкүйерлер, өнер жұлдыздары және ел басшылығы қатысқан үлкен шара өтті.
Салтанатты рәсімді Өзбекстан президенті Шавкат Мирзиёев ашты. Ол ұлттық құраманың әлем чемпионатына шығуын ел футболы үшін тарихи оқиға деп атап, футболшыларға, олардың ата-аналарына, бапкерлеріне және команда мүшелеріне алғыс айтты.
Президент футболшыларға алдағы матчтарда сенімді, батыл және соңына дейін күресуге шақырды.
"Алда сіздерді Португалия, Колумбия және Конго құрамаларына қарсы маңызды ойындар күтіп тұр. Алаңға сеніммен, жігермен және табандылықпен шығыңыздар. Біз әрдайым сіздермен біргеміз", — деді ол.
Әнұран, концерт және символикалық матч
Президенттің сөзінен кейін Өзбекстанның мемлекеттік әнұраны орындалды. Кейін Шавкат Мирзиёев ұлттық құраманың ойыншылары және бапкерлер штабымен бірге естелік суретке түсіп, әр футболшыға табыс тіледі.
Бұдан кейін стадионда өзбек эстрадасының жұлдыздары өнер көрсетті. Олар ұлттық құраманың әлем чемпионатына шығуына арналған әндер орындады. Сонымен қатар футболшылардың тарихи жетістігіне арналған өлең оқылды.
Концерттен кейін Өзбекстан құрамасының ойыншылары алаңға шықты. Олар "А" және "B" командаларына бөлініп, ойын өткізді.
Өзбекстан үшін тарихи мундиаль
Өзбекстан құрамасының әлем чемпионатына жолдама алуы ел футболы тарихындағы ең ірі жетістіктердің бірі саналады.