"Ордабасы" "Қайраттың" 18 матчтық жеңіліссіз сериясын үзді (ВИДЕО)
Футболдан Қазақстан Премьер-лигасының 12-турында "Ордабасы" Шымкентте "Қайратты" 2:1 есебімен жеңді.
"Қайрат" ерте гол соқты
Кездесу алматылықтар үшін сәтті басталды. 14-минутта португалиялық шабуылшы Жоржиньо Эдмилсонның пасын нәтижелі пайдаланып, есеп ашты. Дегенмен алаң иелері тез ес жиып, қысымды арттырды. 26-минутта бұрыштамадан кейін айып алаңында тиімді позиция таңдаған камерундық қорғаушы Ги-Марселин Килама таразы басын теңестірді.
Екінші таймда "Ордабасы" шабуылдағы белсенділігін сақтап қалды. 64-минутта шымкенттік клубтың көшбасшыларының бірі Эльхан Астанов дәл соққысымен командасына маңызды жеңіс сыйлады.
Осылайша "Қайраттың" 18 матчқа созылған жеңіліссіз сериясы үзілді. Алматылықтар ҚПЛ-де соңғы рет былтыр тамыз айында "Елімайға" қарсы ойында ұпайсыз қалған.
"Ордабасы" жеке дара көш бастады
Осы жеңістен кейін "Ордабасы" ұпай санын 28-ге жеткізіп, Қазақстан Премьер-лигасының турнир кестесінде бірінші орынға шықты. Ал "Қайрат" 26 ұпаймен екінші сатыда қалды.
Келесі турда "Ордабасы" Семейге "Елімайға" қонаққа барады. Ал "Қайрат" өз алаңында "Атырауды" қабылдайды.