"Кешірім сұрауы керек": Жорже Жезушке қатаң ескерту жасалды
"Манчестер Юнайтедтің" бұрынғы қорғаушысы Рио Фердинанд Португалия құрамасының бас бапкері Жорже Жезушті Криштиану Роналдумен болған жағдайға байланысты сынға алды.
Фердинандтың пікірінше, маман португалиялық шабуылшымен қарым-қатынаста кеткен қателігін ашық мойындап, одан кешірім сұрауы керек.
"Бапкер шығып, кешірім сұрауы керек. Әйтпесе, оны қызметінен босатуы мүмкін. Ол: "Тыңдаңыздар, мен бұл жағдайды дұрыс бағаламадым" деп айтуы керек", – деді Фердинанд.
Англиялық маман жағдайдың ушығуына бапкер мен футболшы арасындағы байланыстың жеткіліксіз болғаны себеп болуы мүмкін деп санайды.
"Егер қарым-қатынас дұрыс құрылғанда, бұл жағдай мұндай деңгейге жетпес еді деп ойлаймын. Меніңше, ол әлі де командаға пайдасын тигізе алады. Мәселе оның негізгі құрамда шығуында немесе қосалқы құрамнан алаңға шығып, ойынға әсер етуінде. Дәл осындай әңгіме болуы керек еді. Сізге команданы басқарғаныңыз үшін де ақша төлейді. Бірақ адамдармен жұмыс істей білуіңіз үшін де ақы аласыз", – деп түйіндеді Фердинанд.
Роналду Португалия құрамасынан кетті
Криштиану Роналду 30 қыркүйекте Португалия құрамасының орналасқан жерінен кетті. Роналдусыз құрама Ұлттар лигасында Данияны 4:2, ал Норвегияны 2:1 есебімен жеңді.
Төрт турдан кейін Португалия құрамасы 12 ұпай жинап, Ұлттар лигасының А4 тобында көш бастап келеді.