"Астана Арена" Фарер ойыншыларын таңғалдырды
Қазақстан мен Фарер аралдары арасындағы кездесу 6 қазанда, сейсенбі күні өтеді.
Фарер аралдары құрамасы Қазақстанға қарсы матчын өткізу үшін Астанаға келді. Команданың елордаға сапары мен алғашқы жаттығуы туралы Kvf.fo басылымы жазды.
Фарерлік футболшылар "Астана Аренада" жаттығу өткізіп, стадионның жағдайына ерекше назар аударды.
"Бұл – жасанды төсеніш орнатылған заманауи стадион. Қыста аренаның шатыры жабылады. Көптеген футболшылар алаңға шығып, стадионды көрген кезде таңғалды", – деп жазды Kvf.fo.
"Астана Арена" шамамен **30 мың көрерменге** арналған. Алайда басылым алдағы кездесуге 10 мыңнан аспайтын жанкүйер келуі мүмкін екенін жазған.
Астанаға жету оңайға соқпаған
Делегация сенбі күні таңертең Воардан Копенгагенге ұшқан. Кейін тікелей чартерлік рейспен Астанаға жол тартқан. Алайда ұшақ Ресей әуе кеңістігін айналып өтуге мәжбүр болғандықтан, сапар ұзаққа созылған.
Kvf.fo мәліметінше, футболшылар шамамен жеті жарым сағат ұшып, Астанаға жергілікті уақыт бойынша түнде жеткен.
Қазақстан – Фарер аралдары матчы қашан өтеді?
Қазақстан мен Фарер аралдары арасындағы кездесу 6 қазанда, сейсенбі күні өтеді.
Бұл матч UEFA Ұлттар лигасының төртінші туры аясында ұйымдастырылады.