Енді Испания кубогы жартылай финалының жеңімпазы Мадридте анықталады.
Испания кубогының жартылай финалындағы алғашқы матчта каталониялық «Барселона» мен мадридтік «Атлетико» жанкүйерлерге футбол спектаклін сыйлады.
Ойын «Атлетиконың» шабуылымен басталды: 1-минутта Альварес есеп ашса, араға 5 минут салып, Гризманн есепті еселеді. Алайда, Ханси Фликтің шәкірттері бұған тез жауап берді – Педри мен Кубарси 21-минутқа дейін есепті теңестірді. Ал тайм аяқталарда, Иньиго Мартинес «Барселонаны» алға шығарды – 3:2.
Екінші таймда Роберт Левандовски бір гол салып, басымдықты арттыра түсті. Десе де, «Атлетико» ерік-жігер танытып, Льоренте мен Сорлоттың арқасында есепті теңестіре білді – 4:4.
Жартылай финалдың қарымта ойыны 3 сәуірде Мадридтегі «Метрополитано» стадионында өтеді.
