ҚХЛ-дың бұрынғы шабуылшысы, Гагарин Кубогының иегері Михаил Анисин «Барысты» биылғы маусымның басты аутсайдері деп атады.
ҚХЛ-дың бұрынғы шабуылшысы, Гагарин Кубогының иегері Михаил Анисин «Барысты» биылғы маусымның басты аутсайдері деп атады. Ол клубтағы бапкерлік ауыс-түйістерді сынға алып, Вячеслав Буцаевтың отставкасы команданың нәтижесіне кері әсер еткенін мәлімдеді. Бұл туралы ол «РБ Спорт» басылымына берген сұхбатында айтты.
«Вячеслав Буцаевпен болған жағдайды түсінбедім. Ол – жоғары деңгейлі маман, мен онымен бірге жұмыс істедім, жақсы білемін. Бірақ оны небәрі үш аптадан кейін жұмыстан шығарды. Ал жағдай енді ғана тұрақтала бастаған еді. Егер Буцаев қалғанында, команда плей-оффқа шығуға мүмкіндік алар еді. Бірақ оның кеткенінен кейін «Барыс» тек өз орнын сақтаумен ғана шектелді», – деді Анисин.
Биылғы маусымда «Барыс» екі бас бапкерін ауыстырғанымен, нәтиже жақсармады. Анисин сондай-ақ легионерлерге байланысты мәселелерді де көтерді.
«Ресейлік ойыншылардың Қазақстан азаматтығынан айырылып жатқанын көрдік. Оның соңы не болғанын бәрі біледі. Бірақ бұл – клуб басшылығының шешімі. Олардың өз көзқарасы бар», – деп түйіндеді ол.
ҚХЛ-дің биылғы маусымының қорытындысы бойынша «Барыс» плей-офф аймағына өте алмай, турнир кестесінің соңғы орындарының бірінде қалды.
