Қызылорда спорты неге қиналды: Артаев қаржы тапшылығының себептерін айтты

Қызылорда облысының дене шынықтыру және спорт басқармасының басшысы Бақтияр Артаев өткен жылы орын алған қаржылық қиындықтардың себебін түсіндірді.

Оның айтуынша, былтыр жыл соңына төрт ай қалғанда басқарма қаражаты таусылған. Бұған басты себеп — бұрын ұлттық құрама сапындағы спортшыларды республикалық бюджет қаржыландырса, өткен жылы олардың барлығы облыстық бюджет есебінен қамтамасыз етілген.

"Сол кезде жылдың аяқталуына төрт ай қалған еді, ал қаражат жетіспеді. Бұл — негізгі себеп. Мұны ашық айту керек", — деді Артаев.

Сонымен қатар, басқарма қарамағында Олимпиада бағдарламасына кірмейтін спорт түрлері де бар екенін атап өтті. Атап айтқанда, тоғызқұмалақ пен шахмат секілді спорт түрлерінде жарыстар 10 жастан бастап өткізіледі. Мұндай жағдайда бір айдың ішінде ғана жарыстарға қатысу шығыны 40 миллион теңгеге дейін жетуі мүмкін.

Биылғы жоспар жайлы

Осыған байланысты биыл барлық шығындар қайта қаралып, жүйеленген. Қаражат айлар бойынша нақты жоспарланған. Енді федерациялар спортшыларды тек Қазақстан чемпионаттарына, сондай-ақ әлем және Азия біріншіліктеріне ғана жібереді. Ұсақ турнирлер мен жергілікті жарыстарға қатысуға шектеу қойылған.

"Осындай жоспарлы әрі жүйелі жұмыстың арқасында биыл бөлінген қаражат жыл соңына дейін толық жетеді", — деді басқарма басшысы.

Ал қарыз мәселесіне қатысты Артаев барлық уәде орындалғанын және жаттықтырушылар алдындағы берешек толық өтелгенін мәлімдеді. Қазіргі таңда федерацияның қарызы жоқ.

Айта кетейік, өткен маусымда ҚПЛ-де Бақтияр Артаев "Қайсар" клубына қатысты медиакеңістікте жиі назарда болды. Маусым басында оның бастамасымен клуб Қазақстан чемпионатында алғашқылардың бірі болып тек қазақстандық футболшылармен ойнады. Кейін сәтсіз нәтижелер мен жанкүйерлердің наразылығынан соң Артаев құрама деңгейіндегі ойыншылар алынады деп уәде берген. Бұл уәде орындалмағанымен, "Қайсар" маусым қорытындысында ҚПЛ-дегі орнын сақтап қалды.