Қазақстан шахмат Олимпиадасында күміс жүлде иемденді
Қазақстанның әйелдер құрамасы Самарқандта Дүниежүзілік шахмат Олимпиадасында екінші орын иеленді.
Қазақстан Польшаға қарсы шешуші турда тең түсті
16-27 қыркүйек аралығында өткен турнирге ерлер мен әйелдер санатын қосқанда 400-ге жуық команда қатысты. 11-турда Қазақстан әйелдер құрамасы Польшамен кездесті.
Бұл матчта Елназ Қалиахмет жеңіске жетсе, екінші тақтада ойнаған Алуа Нұрман турнирдегі алғашқы жеңілісіне ұшырады. Бибісара Асаубаева мен Меруерт Қамалиденова өз партияларын тең аяқтады. Матчтың қорытынды есебі – 2:2.
Екінші Олимпиада қатарынан күміс алды
2024 жылы Венгрияда өткен шахмат Олимпиадасында Қазақстан әйелдер құрамасы тарихында алғаш рет күміс медаль жеңіп алған еді. Екі жылдан кейін ұлттық құрама сол нәтижені қайталап, әлемдік бәсекеде тағы да екінші орынға тұрақтады.
Әйелдер арасындағы қорытынды:
1. Қытай – 20 ұпай, 9 жеңіс, 2 тең ойын;
2. Қазақстан – 18 ұпай, 7 жеңіс, 4 тең ойын;
3. Үндістан – 17 ұпай, 7 жеңіс, 3 тең ойын, 1 жеңіліс.
Бұл Олимпиада Қазақстан әйелдер құрамасы үшін тарихи нәтижемен есте қалды. 1992 жылдан бері шахмат Олимпиадасына қатысып келе жатқан Қазақстан құрамасы алғаш рет жарысты бірде-бір жеңіліссіз аяқтады. Ұлттық команда 11 турдың жетеуінде жеңіске жетіп, төрт матчта тең түсті.
Қазақстан шахматшыларының жеке нәтижелері
1-тақта – Бибісара Асаубаева, 22 жаста. 3 жеңіс, 7 тең ойын.
2-тақта – Алуа Нұрман, 19 жаста. 5 жеңіс, 4 тең ойын, 1 жеңіліс.
3-тақта – Меруерт Қамалиденова, 21 жаста. 3 жеңіс, 4 тең ойын, 3 жеңіліс.
4-тақта – Елназ Қалиахмет, 16 жаста. 3 жеңіс, 1 тең ойын, 1 жеңіліс.
Қосалқы құрам – Зарина Нұрғалиева, 16 жаста. 2 жеңіс, 2 тең ойын, 1 жеңіліс.
Қазақстан құрамасындағы екі шахматшы Олимпиадада алғаш рет өнер көрсетті.
Асаубаеваның ерекше сериясы жалғасты
Қазақстан құрамасының көшбасшысы Бибісара Асаубаева қатарынан үшінші шахмат Олимпиадасында жеке партияларда жеңіліс тапқан жоқ. Оның соңғы үш Олимпиададағы көрсеткіші:
- 2026 жыл – 3 жеңіс, 7 тең ойын;
- 2024 жыл – 3 жеңіс, 6 тең ойын;
- 2022 жыл – 5 жеңіс, 6 тең ойын.
Ерлер құрамасы Вьетнаммен тең түсті
Қазақстанның ерлер құрамасы соңғы турда Вьетнаммен 2:2 есебімен тең ойнады. Open санатындағы қорытынды:
1. Өзбекстан – 20 ұпай;
2. Үндістан – 18 ұпай;
3. Германия – 18 ұпай.
Қазақстан құрамасы 15 ұпай жинап, 20-30 орындар аралығындағы топта орналасты. Команда 6 жеңіс, 3 тең ойын және 2 жеңіліс тіркеді.