Аргентинада аты аңызға айналған футболшы Диего Марадонаның өліміне байланысты сот процесі басталады.
Трагедиядан төрт жыл өткен соң жеті медицина қызметкері сот алдында жауап береді. Тергеу мәліметтері бойынша олардың салғырттығы мен тиісті күтімнің болмауы футболшының өліміне әкелген. Егер айыптары дәлелденсе, күдіктілер 8 жылдан 25 жылға дейін бас бостандығынан айырылуы мүмкін.
Диего Марадона 2020 жылдың қараша айында жүрек ұстамасынан қайтыс болды. Оның денесі Буэнос-Айрестегі жеке үйінде табылған. Бұл жерде ол миындағы қан ұйындысын алып тастау бойынша жасалған операциядан кейін оңалтудан өтіп жатқан. Сарапшылардың пікірінше футболшының жағдайының нашарлауына ұзақ жылдар бойғы алкоголь мен есірткіге тәуелділігі әсер еткен.
Марадонаның өлімінен бір жыл өткен соң, 20 медицина маманынан құралған тәуелсіз сарапшылар тобы тергеу жүргізіп, футболшының тиісті ем мен күтім көрсетілген жағдайда өмір сүру мүмкіндігі жоғары болғанын анықтады.
Марадонаның отбасы оның емдеуші дәрігерлерін қасақана немқұрайдылық танытты деп айыптап отыр. Айыптаушылардың мәлімдеуінше, медициналық топ футболшының өміріне төнген қауіп туралы білген. Бірақ қаржылық мүдделерін бірінші орынға қойып, қажетті шараларды қабылдамаған. Осылайша олар спортшыны қараусыз қалдырды.
