Шымкентте Жақсығұл мерген атындағы дәстүрлі садақ атудан Азия кубогы аяқталды.
Байрақты бәсекеге 11 елден 128 спортшы қатысты. Төрт күнге созылған жарыста садақ ату шеберлері пута және жамбы нысанасы бойынша кіл мықтыны анықтады.
Пута нысанасы бойынша ерлер арасында Азамат Нұртаев қарсылас шақ келтірмеді. Ал бұрымдылар арасында Әсемгүл Ғалымжанованың бәсі жоғары болды.
Жамбы нысанасында Ербол Тапенов пен қырғыз қызы Шолпанай Өмірқұлова топ жарды. Жарыс қорытындысы бойынша қазақстандық ұл-қыздар 3 алтын, 4 күміс, 7 қола медальмен көш бастады. Қырғызстан бір “алтынмен” екінші орынға жайғасса, бір “қоласы” бар Түркия үздік үштікті түйіндеді.
