Қазақстандық волейболшы Сәбина Алтынбекова жеке өміріндегі өзгерістер мен өзін бақытты сезінуге көмектесетін қарапайым нәрселер туралы ой бөлісті. Күнделікті жаттығулар мен жарыстарға толы қарбалас өміріне қарамастан, спортшы өзін қуантатын сәттерді тапқанын айтты.
Сәбина өзінің Instagram парақшасында шынайы бақыттың күнделікті өмірдегі қарапайым әрі жағымды сәттерден құралатынын жазды. Оның айтуынша, жақсы көңіл-күй мен ішкі тепе-теңдікті сақтау үшін көп нәрсе қажет емес.
"Менің көңіл-күйімді көтеретін нәрселер – дәмді тағам, гүлдер және ішкі жан дүниемнің тепе-теңдігі", – деп жазды Алтынбекова.
Жақында волейболшы ажырасқанын мәлімдеген болатын. Кейінірек ол әлеуметтік желіде пост жариялап," Әйел адам өмірінде ненің маңызды, ненің маңызды емес екенін өзі таңдайды" деп жазды.
Осы күндері Сәбина туған қаласы Ақтөбеге барып, жақындарымен уақыт өткізген. Әлеуметтік желіде отбасымен және достарымен түскен бірнеше суретпен бөлісті.
Спортшының айтуынша, ішкі үйлесім мен қарапайым қуаныштарды бағалау – өмірді толыққанды әрі бақытты ететін басты факторлар.
Сәбина Алтынбекова өміріндегі өзгерістерді сабырмен қабылдап, өзін жақсы сезінудің жолдарын тапқандай. Ол спорттағы жоғары жетістіктерге жету үшін ішкі тыныштық пен қарапайым бақыттың маңыздылығын ерекше атап өтті.
