Жарысқа 30-дан астам елдің өкілі қатысты.
Эстония астанасы Таллин қаласында ұлттық зияткерлік ойын – тоғызқұмалақтан турнир өтті. Жарысқа 30-дан астам елдің елшілері мен дипломаттары қатысты. Бұл туралы 24KZ хабарлады.
Іс-шара қазақ халқының мәдениеті мен ұлттық ойындарын насихаттау мақсатында ұйымдастырылды.
Ойын ережелерін түсіндіріп, қатысушыларға шеберлік сағатын өткізу үшін Таллинге тоғызқұмалақтан үш дүркін әлем чемпионы Серік Ақтаев арнайы келді. Ол қатысушыларға ойынның қыр-сырын таныстырып, тәжірибелік көрсетілім жасады.
Тоғызқұмалақ – төрт мың жылдан астам тарихы бар қазақтың ұлттық ойыны. Ол логикалық ойлау, стратегиялық шешім қабылдау және есте сақтау қабілетін дамытады. Қазіргі таңда бұл ойын әлемдік деңгейде танылып, халықаралық аренада ойнаушылар қатары артып келеді.
