Қазақ мақтанышы, әлем чемпионы Махмұд Сабырхан әлеуметтік желіде ерекше бейнежазба жариялады.
Видеода Қазақстан ұлттық құрамасының көшбасшысы Махмұд пен оның туған інісі Төрехан, сондай-ақ олардың әкесі көрініс табады. Екі бірдей әлем чемпионы бокс қолғаптарын киіп, әкелеріне қарсы «шартты жекпе-жекке» шығады. Алайда үйдің иесі чемпиондарға дес бермей, қолындағы қос қамшымен балаларына «нақты дайындық» ұйымдастырады.
«Үйде осылай жаттығамыз», — деп жазды Махмұд Сабырхан Instagram парақшасында.
Айта кетейік, Ливерпульде өткен World Boxing чемпионатында Махмұд пен Төрехан Сабырхан қазақ спорты тарихында бұрын-соңды болмаған жетістікке жетті. Екі туған бауыр әлем біріншілігінде қатарынан алтын медаль жеңіп алып, әлемдік әуесқой бокстың тарихына есімдерін алтын әріппен жазды.
