Атырауда өткен қайырымдылық аукционында ерекше спорттық жәдігер қомақты сомаға сатылды.
Қайырымдылық мақсатындағы аукционда «Қайрат» және Қазақстан құрамасының қақпашысы Темірлан Анарбековтің қолтаңбасы бар доп 12 миллион теңгеге сатылды.
Бұл жаңалықты қайырымдылық қоры өзінің Instagram парақшасында хабарлады. Жиналған қаражат Атыраудағы мұқтаж отбасыға баспана сатып алуға жұмсалмақ.
Қор жетекшісі Асхат Нұрмашев аукционның қалай өткенін баяндады:
«Біз бұл аукционды отбасыға үй сыйлау мақсатында бастадық. Алматыда тұратын ағамыз аукционды көріп, бейжай қалмады. Ол: “Бұл менің үлесім болсын, Атыраудағы тағы бір отбасы үйлі болсын. Мен Темірлан Анарбековтің қолтаңбасы бар допты сатып аламын”, — деді де, 12 миллион теңге аударды».
Аукцион туралы жарияланған жазба бірнеше мың лайк пен пікір жинады. Көпшілік қайырымдылық қорының бастамасына және Темірлан Анарбековтің қолдауына ризашылық білдірді.
