Қазақстандық үш чемпион. Жәнібек Әлімханұлы ерекше фото жариялады
Жәнібек Әлімханұлы X желісінде Шавкат Рахмонов және Садриддин Ахмедовпен бірге түскен суретін жариялады.
Қазақстандық кәсіпқой боксшы, WBO нұсқасы бойынша орта салмақтағы әлем чемпионы Жәнібек Әлімханұлы әлеуметтік желідегі парақшасында жаңа жазба жариялады.
Ол X желісінде UFC файтері Шавкат Рахмонов және кәсіпқой боксшы Садриддин Ахмедовпен бірге түскен суретін бөлісті. Жәнібек фотосуретке қысқа ғана:
"Қазақстан", — деп жазды.
Үш танымал спортшы бір кадрда
Жарияланған сурет қазақстандық жанкүйерлердің назарын бірден аударды. Себебі кадрда ел спортындағы ең танымал үш есім қатар тұр.
- Жәнібек Әлімханұлы — орта салмақтағы WBO чемпионы.
- Шавкат Рахмонов — UFC-де жеңіліп көрмеген қазақстандық файтер.
- Садриддин Ахмедов — кәсіпқой бокста ел намысын қорғап жүрген спортшылардың бірі.
Қазіргі уақытта Жәнібек Әлімханұлы оң допинг сынамасына байланысты дисквалификация мерзімін өтеп жатыр. "Қазақ стилінің" рингке қайта оралуы осы жылдың желтоқсан айына жоспарланып отыр. Алдын ала ақпарат бойынша, Әлімханұлы WBO нұсқасы бойынша "уақытша" чемпиондық белбеу иегері, британиялық Дензел Бентлиге қарсы жекпе-жек өткізуі мүмкін.
Садриддин Ахмедов соңғы ресми жекпе-жегін 2025 жылдың 19 сәуірінде өткізді. Ол мексикалық Элиас Эспадаспен жұдырықтасып, қарсыласын жеңе алған жоқ. Он раундқа созылған кездесу төрешілердің көпшілік шешімімен тең аяқталды. Бұл нәтиже Ахмедов үшін күтпеген жағдай болды.
Ал Шавкат Рахмонов қазіргі уақытта тізесіндегі жарақатына байланысты жасалған операциядан кейін қалпына келіп жатыр.
"Номад" соңғы рет октагонға 2024 жылдың желтоқсанында шыққан. Сол кезде ол ирландиялық Иэн Гэрриді төрешілердің бірауыздан шешімімен жеңген еді.