Қайрат Боранбаевқа тиесілі болған фитнес-орталық миллиардтарға сатылды
Сауда қорытындысында сатып алушы бастапқы бағадан 13% жоғары ұсыныс жасаған.
Астанадағы Fitnation спорттық-сауықтыру орталығы электронды аукцион арқылы 2,305 млрд теңгеге сатылды. Бұған дейін нысан кәсіпкер Қайрат Боранбаевқа тиесілі болған еді.
Сауда қорытындысында сатып алушы бастапқы бағадан 13% жоғары ұсыныс жасаған.
Аукцион екінші әрекетте өтті
Fitnation орталығын сату бойынша аукцион 3 қарашада e-Qazyna платформасында ұйымдастырылды.
Бұл нысанды өткізудің екінші әрекеті болды. Алғаш рет кешен 15 қазанда 2,9 млрд теңгеге саудаға шығарылды, алайда сатып алушы табылмады.
Кейін нысан қайта аукционға қойылып, 2,305 млрд теңгеге сатылды.
Кешенге не кіреді?
Лот құрамына жалпы аумағы шамамен 4 мың шаршы метр болатын ғимарат пен оған жалғасқан нысандар, сондай-ақ 510 бірлік жабдық енген.
Спорт кешенінде:
- жаттығу залдары;
- бассейндер;
- SPA аймағы бар.
Ал жер телімі мәміле құнына кірмейді. Оны жаңа меншік иесі бөлек сатып алуы немесе тиісті төлем жасауы тиіс.
Fitnation мемлекет меншігіне қалай өтті?
Fitnation желісі Қайрат Боранбаевқа қатысты қылмыстық іс бойынша келтірілген залалды өтеу аясында мемлекет меншігіне өтті. Нысан әкімдік балансында болған кезеңде мұнда ерекше қажеттілігі бар балаларды оңалту жұмыстары да жүргізілді.