Нұрқожа Қайпанов 2025 жылғы маусымды 70 келіде күресетінін мәлімдеді.
Еркін күрестен әлем чемпионы Нұрқожа Қайпанов биылғы маусымда олимпиадалық емес 70 келі салмақ дәрежесінде өнер көрсететінін ресми түрде жариялады. Бұл шешім спортшының жеке физикалық жағдайына және жарыс стратегиясына байланысты қабылданған.
«Олимпиадаға әлі уақыт бар. 70 келіде өзімді шын мәнінде мықты сезінемін – физикалық, техникалық тұрғыдан күшім артады», – деді балуан.
Спортшының айтуынша, 74 келі салмақта белдесу үшін салмақты үнемі ұстап тұру қажет, бұл өз кезегінде күш-қуатты азайтады. Ал 70 келі — Нұрқожаның табиғи салмағына жақын, сондықтан техникалық әлеуеті мен физикалық дайындық деңгейі жоғарырақ болады.
«Қалыпты салмағым — 76–77 келі. 74 келіге түсу үшін көп күш жұмсауға тура келеді. Бұл спорттық нәтижеге әсер етуі мүмкін», – деп атап өтті ол.
Қайпанов енді жарыстарда Алматы қаласы атынан өнер көрсетеді. Бұл шешімнің басты себебі – отбасылық жағдай.
«Отбасым Алматыда тұрады. Мен – үйдің үлкенімін, інілерім мен қарындастарыма жол көрсету — менің міндетім. Осыған байланысты Алматыға көшу туралы шешім қабылдадым», – деді Нұрқожа.
Ол ешқандай қысым немесе ақша ұсынысы болмағанын, бұл жеке шешімі екенін нақты айтты. Спортшы Алматыда әзірге жалақы алмайтынын да жасырған жоқ.
«Алматы күрес федерациясының басшысы Омар Әлиев: ‘Біз саған Петропавлдағыдай жалақы төлей алмаймыз. Бізде балуан көп’, – деді. Бірақ бұл мен үшін басты мәселе емес», – деді ол.
