Иордания астанасы Амманда бокстан жасөспірімдер арасындағы алғашқы Азия чемпионатының финалистері анықталды.
Жарыстың жартылай финалдық кезеңінен кейін 15 және 17 жасқа дейінгі боксшылар арасында үздік үш ұлттық құрама анықталды.
Қазақстан құрамасы финалға ең көп спортшы шығарған команда атанды. Біздің елден 31 боксшы шешуші жекпе-жектерге жолдама алды: олардың 19-ы – U15 санатында, ал 12-і – 17 жасқа дейінгі санатта бақ сынайды.
Өзбекстан құрамасы да лайықты өнер көрсетті – финалға 30 боксшы өтті. Әр жас санатынан 15 спортшыдан қатысады.
Ал Үндістан құрамасы финалдық кезеңге 21 боксшыны шығарды. Оның ішінде 14-і – U15 санатында, 7-еуі – U17 санатында алтын жүлдеге таласады.
Айта кетейік, бұл – World Boxing ұйымының аясында ұйымдастырылған Азия құрлығындағы алғашқы әрі тарихи чемпионат. Мұндай деңгейдегі жарыстар болашақ чемпиондардың есімін анықтауға және бокс әлеміндегі жаңа дәуірді бастауға ықпал етеді.
