Содан кейін қандай қорытындыға келгенін де ашық айтты.
Қазақстандық танымал аралас жекпе-жек шебері Артем Резников кәсіби мансабының басында допинг қолданғанын ашық мойындады. Ол бұл тәжірибеден қандай қорытынды шығарғанын айтып, қазіргі спортшыларға нақты кеңес берді.
Sarbaz Podcast жобасына берген сұхбатында Артем Резников допингке қатысты ойын ашық білдірді:
«Карьерамды бастағанда түрлі кеңестер айтылды: “Мынаны іш, ананы істе” дегендей. Бірдеңелерді байқап көрдім. Бірақ кейін бәрі сылтауға айналады: “ана бұлшық ет тартылды, мынасы шаршады” деген сияқты. Бұл – кедергі келтіреді. Ең дұрысы – жүрекке арналған препараттар. Өйткені жекпе-жекте жеңісті күш емес, тыныс пен төзімділік алып келеді. Әсіресе бес раундтық айқастарда».
Резниковтың айтуынша, ауыр стероидтар қолданатын спортшылардың мансабы ерте аяқталады. Себебі олар ағзаны іштен бұзады:
«20-дан 30-ға дейін “химиямен” дайындалған адам ерте тоқтайды. Стероидтар сені жақсартпайды, керісінше — ішкі органдарыңды құртады. Бауыр, жүрек, бүйрек – бәрі жұмыс істемейді. Ал дәріханалық препараттар, вена арқылы егілетіндері – олар тек спорттық форманы емес, ішкі ағзаларды да жақсартады. Сол себепті 40 жасқа дейін жекпе-жекке шығып жүргендер дәл осындай жолмен дайындалады деп ойлаймын».
